ሁለተኛው የህብረት ስምምነት ተፈረመ

Hits: 170

የኢትዮጵያ ኤሌክትሪክ አገልግሎት ከተቋሙ መሰረታዊ ሠራተኛ ማህበር በጋራ በመሆን ለሁለተኛው ጊዜ ያዘጋጁትን የሠራተኞች ህብረት ስምምነት  ሰኔ 8 ቀን 2014 ዓ.ም ተፈርሟል፡፡

000hibretsimmenet

የህብረት ስምምነቱን የፈረሙት የተቋሙ ዋና ስራ አስፈጻሚ አቶ ሽፈራው ተሊላ እና የመሰረታዊ ሠራተኛ ማህበር ሊቀመንበር አቶ ሃይሉ ዘውዴ ናቸው፡፡

ለሁለተኛ ጊዜ እንደገና የተሻሻለው ይህ የህብረት ስምምነት፤ በአሰሪና ሰራተኛ አዋጅ ቁጥር 1156/2011 ዓ.ም መሰረት መሆኑን የሰው ሃብት አስተዳደርና ልማት ዳይሬክቶሬት ዳይሬክተር ወ/ሮ ዘሪቱ ፍቅሬ ገልፀዋል፡፡የህብረት ስምምነቱ የተቋሙን፣ የሠራተኛውንና የደንበኛውን ጥቅም ባስጠበቀ መልኩ ሥራዎች ለማከናወንና ሰራተኛው መብትና ግዴታውን አውቆ እንዲሰራ ለማድረግ የሚረዳ መሆኑንም ተናግረዋል፡፡
 
ዳይሬክተሯ አክለውም በተሻሻለው የህብረት ስምምነት ከተካተቱ አንቀፆች መካከል ከሰኞ እስከ አርብ ብቻ የነበረውን የሥራ ቀን እስከ ቅዳሜ ግማሽ ቀን ድርስ የተራዘመ ሲሆን፤ በዚህም ጥራት ያለውና አስተማማኝ አገልግሎት ለመስጠትና የደንበኞችን የእርካታ ደረጃ ከፍ ለማድረግ ታሳቢ ያደረገ መሆኑን ጠቅሰዋል፡፡
 
የመሰረታዊ ሰራተኛ ማህበር ሊቀመንበር አቶ ሃይሉ ዘውዴ በበኩላቸው የህብረት ስምምነቱን ማሻሻል ያስፈለገው የመጀመሪያው ስምምነት የአራት ዓመት የቆይታ ጊዜው በመጠናቀቁና ለአሰራር ምቹ ያልሆኑ አንቀጾችን ለማሻሻል፣ ሰራተኞችንና ደንበኞችን ተጠቃሚ ሊያደርጉ የሚችሉ ተጨማሪ አንቀጾችን ለማካተት ታስቦ መሆኑን ገልፀዋል፡፡በዚህም ለተቋሙ ደንበኞችና ሠራተኞች ተጠቃሚ የሚያደርጉ በርካታ አንቀፆች መሻሻላቸውንና መጨመራቸውን አስታውቀዋል፡፡
 
አቶ ሃይሉ አክለውም በዚህ ህብረት ስምምነት በበፊቱ በግልፅ ተለይተው ያልተቀመጡ የስራ መስሪያና የስራ ላይ ደህንነት መጠበቂያ ቁሣቁሶች መቀመጣቸውን፣ ሃላፊነቱን በአግባቡ በማይወጣ ሰራተኛ ላይ ስለሚወሰዱ የተጠያቂነት ስርዓት፣ ስለሚያገኙት ጥቅማ ጥቅም ጨምሮ ሌሎች ጉዳዮችን የሚመለከቱ አንቀፆች ተካተዋል ብለዋል፡፡
 የተፈረመው የህብረት ስምምነት ለቀጣይ አራት አመታት አንደሚያገለግል በፊረማ ስነ ስርዓቱ ላይ ተገልጿል፡፡
ወቅታዊና ትኩስ የተቋማችን መረጃዎች ወዲያውኑ እንዲደርሳችሁ እነዚህን የትስስር ገፆቻችንን ይወዳጁ፡-
Print